“OpenAI” şirkəti “Broadcom” ilə əməkdaşlıq çərçivəsində hazırladığı ilk xüsusi süni intellekt çipini təqdim edib.

“Jalapeño” adlanan yeni prosessor OpenAI-nin süni intellekt modellərinin işlədilməsi (inference) prosesləri üçün xüsusi olaraq dizayn edilib. Şirkətin məlumatına görə, çipin hazırlanması zamanı OpenAI-nin öz süni intellekt modellərindən də istifadə olunub.

Hazırda sınaq mərhələsində olan “Jalapeño”nun ilkin nəticələri mövcud qabaqcıl alternativlərlə müqayisədə enerji sərfiyyatına görə daha yüksək məhsuldarlıq nümayiş etdirdiyini göstərir.

OpenAI və Broadcom arasında strateji tərəfdaşlıq ötən ilin oktyabrında rəsmən elan edilsə də, şirkətin uzun müddətdir Nvidia qrafik prosessorlarından asılılığını azaltmaq məqsədilə öz çipini hazırladığı barədə məlumatlar yayılırdı. Daha əvvəl Google və Amazon da süni intellekt iş yüklərini sürətləndirmək üçün xüsusi hazırlanmış AI akseleratorlarını istifadəyə vermişdilər.

Yeni çip əsasən istifadəçi sorğularına cavab vermək üçün hazır süni intellekt modellərinin işə salındığı inference proseslərinə yönəlib. OpenAI xüsusilə real vaxt rejimində çalışan proqramlaşdırma modellərində aşağı əməliyyat xərclərinin təmin edilməsini vurğulayıb.

Şirkət hesab edir ki, süni intellekt infrastrukturunun bütün səviyyələrinə – çip arxitekturasından yaddaş sistemlərinə, şəbəkələşmədən yerləşdirmə və məhsul təcrübəsinə qədər – nəzarət etməsi modellərin daha sürətli, etibarlı və əlçatan olmasına imkan verəcək.

OpenAI bildirib ki, məqsəd süni intellekt modellərini istifadəçilər üçün daha sürətli, daha etibarlı və daha sərfəli etməkdir.